أرشيف | يناير, 2013

أزرق

22 يناير

اللون الأزرق بينزل من السما…

ركض بالشارع وقلبه أكبر من العالم، بعيونه اشي حاسّه من قبل ما يشوفه ويعرف معالمه، لكن متأكد منّه لدرجة اننو ابتسم ابتسامه مغروره وركض، ركض وحس اننو كل الأشياء عم بتحييه وبتنحنيله، الناس عم تختفي، بيمرق على أماكن بيعرفها وبيزورها كل يوم، بس عم بيشوفها من ورا القزاز، كأنها صور من فيلم، وهو نفسه بالمشهد بمدينة كرتون راح تتذكّره… وصل لهناك، كان أقوى اشي عالأرض… هو وبس، رفع المسدس وطلب كل الفلوس اللي بالخزنة من دون عنف مش همّه يكون بطل من فيلم، هو هلق عالأرض، والدنيا برّه زرقا وبتدت تتلون بالرمادي زي الفقراللي صبغ المدينة وصبغ قلبه من جوّا، أخد المصاري وطلع يركض، قلبه راح ينفجر بس لسّه فخور، لسّه سعيد، لازم يوصل قبل ما يمسكوه، لازم يوصل… طلع لفوق لفوق لأعلى عمارة، وقّف، فتح الشنته وطيرهم… بحركة خفيفة كأنه عم بطيّر حمام، بس  الحزن كان عم يطلع من معدته لعيونه، عيونه حزنت وتقلت كإنها عم تنبلع لجوّا، المنظر كان تاريخي مع اننو بطّل شايف، وكأنه البحر أكل المدينة… وكل شيء صار أزرق، والأزرق بيصير بنفسجي لمّا بينخلط بالأحمر… وهيك كان لون البحر.

البطولة بمنظورنا الشخصي ما بتموت عادةً، حتى لو ما بنعرف صحابها، حتى لو مش حقيقيين…بنكتب عنهم بعد 40 سنة

Advertisements